لا مالح ولا مايع

Emad Al Hawary ٢٢ أكتوبر ٢٠٢٠

لما سحابة ذكرياتي
تقفل عيني عن انهارده،
واللي جاي
والاقي احلامي ملفوفة بأكفاني
وف موتي عفنت،
والاسم حي!
وسلاسل الماضي التقيلة المصدية
اتحالفت مع جراح محفورة ف قلبي
وف ركن عتمة مستخبية.
وعملوا مني "مسخ"
ملهوش ملامح
لا انا عايش يومي كما الإنسان
ولا ميت ولا ليَّ كرامة،
ولا متهان!

مالي كدا باهت ف الألوان؟
لا ليَّ طعم ولا معنى،
ولا عنوان
لا انار حار ولا بارد
لا مالح ولا مايع
لا انا مخلص ولا خوُّان
لا نا مكشر ولا فرحان!

لا عارف أخبي بلوتي،
ومهما حاولت،
المستخبي يبان

وجه الوقت عشان
يسقط ..يسقط كل جبان
وأطيّر وطاويط الضلمة،
والكتمان
وأقول مشاعري وأفضفض
وافتح شبابيك المسامحة،
والغفران
تشقشق شمس الشفا
وتشق عتمة الجدران
وتملى الدنيا دفا ونور وأمان
وترجع ملامح سمره طيبة
لإنساني الهربان.

 

Emad Al Hawary