لحظة

مريم ٢٢ أكتوبر ٢٠٢٠

اول مرة من سنة اتلامس مع نفسي من سنة ودي كانت بداية الصحوة

حاسة اني مش راضية عن نفسي

وزني زايد وافكارى وسلوكي متناقضين

احساسي بالامان مهزوز وضعيف ومتوقف على زعلي معاه من عدمه

مش عارفة اقف ف الدنيا على رجلي من غيره او حتى افكر ف الاحتمال دا

لكن شايفة اني كل يوم بضيع من نفسي

ف الاول كان مصدر للامان والحنية والحب وبعد شوية الشروط والواجبات بدات تتفرض وللاسف بشكل غير مباشر حسيت اني شوية شوية بتنازل وكل ما يقوللي على حاجة اعملها واقول ايه يعني هو أهم. واللي بعدها واللي بعدها لحد ما لقيت نفسي مش باقيلي حاجة من شخصيتي لدرجة اني بخاف افكر قبل ما اعرض فكرتي عليه فما بال الفكرة دي لو نفذتها من غير مارجعله

ف الاول كنت مبسوطة عشان ف حياتي حد بيشاركني وبشاركه لكن لما اتحول الموضوع انه الزامي ولو محصلش بلاقيه غضبان بشوف كياني بيتهدد اوي

الموضوع يبان ظاهريا انه بند واحد مختلفين لكن انا قادرة اميز انه بند مؤثر وعميق جدا وف صميم احساسي بنفسي وكمان احساسي بالامان اللي كنت حساه معاه ف الاول

حاسة اني نادمانه عشان اتنازلت عن حجات بسطية شوية شوية وخدعتني الابتسامة واللطف والرقة ومجرد ما كان الطلب الرقيق بيدخل ف حيز التنفيذ بيبقى حق مشروع

يعني ف الاول مكنش الطلب بيتعرض ف صيغة انا كدا وانتي تبعي ومش هاتغير ويبقى ضمنيا معناه يا تسمعي كلامي يا بلاش العلاقة كلها، او انا بحس بالتهديد دا

ولما بحس للحظة ان العلاقة هاتنتهي بشوف اشباح كتيره اوي واحد منها اسمه الوحدة ودا اقلهم رعبا وفزعا لكن افظع شبح هو الاحساس بالفشل والرفض وباني مش عارفة اكمل ف اي حاجة للاخر ولا انجح ف اي حاجة وكان العلاقة دي هي اخر فرصة ليا عشان اثبت لنفسي اني بعرف اعمل اي حاجة وياسلام لو الحاجة دي هي اني ابقى مرتبطة بشخص بيحبني وبحبه ومتفاهمين (افكار من المجتمع)

انا جوايا حاجتين عكس بعض الاولى هي رعب فكرة انهاء العلاقة لاني بجد مخنوفة ومش عايشة نفسي حاسة اني بعيش شخصية واحدة تانية غيري والتانية اني بلوم نفسي على مجرد اني افكر انهي العلاقة وبجلد نفسي كتير وبقولها انتي يتدلعي انتي عايزة تعيشي على حل شعرك انت ماتنفعيش تشاركي حد اي حياة عشان انتي متسلطة ومش عايزة تسمعي غير نفسك

وكاني لو انهيت العلاقة دي فكاني باكد لنفسي اني فاشلة ومتسلطة وكل الصفات السلبية دي

زي ما تكون العلاقة دي حلبة مصارعة او مسابقة عايزة اطلع منها كسبانة لكن خصمي عنيد ومحتار خصمي هو نفسي

مش عارفة ليه من سنتين كنت مبسوطة بان حد واخد باله مني وبيشاركني كل كبيرة وصغيرة وانهارده ومن كام شهر بس حسيت ان كل الحاجات دي انا مخنوقة منها

مجرد ما بقى في خناقات بسبب اللي عايزني اعمله واللي هو اصلا ضد قناعاتي بدات احس بالقهر او باني سكت كتير لحد ما هو استغل تنازلاتي

مش عارفة هو مدرك انا قد ايه مضغوطة وانا بعمل حاجات ضد طبيعتي بس عشان ارضيه وعشان بحبه ولا مش شايف خالص حالتي؟

بجد لو مدرك مكنش زودها مكنش تمادي وكتر من الطلبات كل شوية كان تغاضي شوية عن رغباته او معتقداته

لكن هو مش عارف او مش قادر يعمل كدا بس المشكلة اني انا كمان مش قادرة ادوس على نفسي اكتر من كدا...انا تعبت

 

مريم 

مارس 2012