اصحى الصبح بدرى .. مش في دماغي حاجة غير كباية نسكافية او شاي .. بعدها اجرى اروح مشواري او شغلي ..تبدا الأفكار تيجلى حبه حبه زي ما بيدا المطر .. والجو غيم والفكر ابتدأ يبقى زحمة .. طيب هجيب اية اكله وانا مروح بعد ما اخلص شغل ومشواري .. هو انا نسيت اكلمه فى التليفون يوه ... كل شوية انسى .... طيب انا لسة مرحتش عند قريبي اسال علية اخر مرة كان زعلان ... انا حاسس انى عاوز اخس شوية .... أفكار من هنا ومن هناك وكأنى دخلت سوبر ماركت كبير مش عارف انا عاوز منة اية بالضبط ..افكار افكار افكار ...
انقطع الحديث الفكرى .. لقيت حد اتكلم معاه شوية ... دش دش دش الساعة بقت 3 الظهر .. هبدا اجهز نفسى عشان اروح ... طيب يا ترى الموصلات ه تكون زي كل مرة ولا اية؟؟ انا مش راضي عن حالى خالص ولا فكرت ولا عملت اى حاجة من الحاجات المهمة.....
وانا سايق اوفى المواصلة مضايق انى ضيعت وقت الصبح كلة ومعملتش حاجة ..... اما ادخل النت شوية ... نت نت نت .. الساعة بقت 6 ..طيب اعمل اية انزل الكنيسة ولا اشوف صحابي .. طيب واللى عاوز اعمله ؟؟... بص الساعة بقت 7 .حاسس انى مشوش مش عاوز اعمل حاجة ... بقت 8 .. طيب اكل حاجة ... بقت 9 ... اسمع فليم ولا اصلى ولا اقرا فى كتاب... مش عارف نفسى مسدوده لية ..؟؟؟ 9:30
يبداء الاحساس بالذنب ان الوقت عدى من غير فايدة ...:00 10 ... حاسس انى تعبان وعاوز انام ... 10:30 ... لا كدة كفاية انا هروح انام وبكرة انشاء الله هعمل اللي عاوز اعمله ..
بكرة بعد بكرة .... أسبوع اثنين... شهر اثنين .. سنة ... احساس بالذنب وسنة تجر سنة .
سنين عدت بدون اى فايدة ولا تأثير ..حتى التغير كان بفعل الزمن والاخرين.. منقاد الية مش من اختياري. قيد جديد على النفس...سجن جديد جوه سجن الياس ..طيب انا كنت عاوز ابقى اية ... مش عارف... طيب سيبك من اللى فات .. انت عاوز تعمل اية .. بردو مش عارف .. طيب فين نقطة البداية .. نظري ضعف .. طيب عافر .. هو بعد ما شاب ودوه الكتاب...ضيف على الاحداث دى ...مشاكل الشغل .المشاكل النفسية .. المشاكل الروحية .. المشاكل العائيلة ... المشاكل المشاكل ..وطبعا المشاكل تاتى بأفراد عائلتها من الضغوط..والالم نتيجة الضغط.. ثم الهروب بطريقة او ب أخرى حسب استحسان النفس..
ويحبذا لو فيه اى نوع من أنواع الإدمان.. كدة قضي الامر
وياسلام لو كان متجوز وعنده علية ..وعنده أولاد ..قول على يومه يا رحمان يا رحيم ... دا قصة تانى ..
تسالى ..هو اية دا ..؟؟ دا طبيعي ..طيب لو دا طبيعى ..اما اية اللى مش طبيعى ؟...اية الحل .. قالى القسيس الحل والراحة عند يسوع .. لما بصيت على حيات القسيس لقيتة بيضحك على نفسة .. بيقول كلام حافظة .. وبيضحك بية على النفس وعلينا وباب النجار طلع مخلع.. طيب اية ؟؟؟
سالت واحد يبدو علية انه ليس لدية مشاكل.. كان تعيس جدا ...ليه ؟؟؟؟عشان هو معندوش مشاكل ..ايوة تعيس!.. عندى احساس ان النفس البشرية دى من بعد السقوط اتجننت ..بقت غير عقلانية ..غير انسانيه.. غير كل حاجة
عشان كدة كل حاجة بالشقلوب.. ..
.
ملحوظة : بصراحة مش عارف اية الفائدة من اللى كتبة بس يمكن ده حال البعض.. ممن يعانون من عدم وجود معنى للحياة .
karam yousif
