مصرى وأبويا مصرى

مايكل مكرم ٢٢ أكتوبر ٢٠٢٠

مصرى وأبويا مصرى

 

 

- لأنى مصرى باعدى الشارع من غير ما ابص ... وباستغرب لو لقيت عربية هتخبطنى

 

- لأنى مصرى باسوق العربية بسرعة ... وباتوقع انى مش هاعمل حادثة

 

- لأنى مصرى باسوق العربية بتهور ... وباتوقع انها مش هتتخبط ولا حتى تتخدش

 

- لأنى مصرى باتجاوز السرعة القانونية ... وباستغرب لو اخدت مخالفة

 

- لأنى مصرى باسوق بسرعة على الدائرى ... وباتصور ان الرادار مش هيصورنى

 

- لأنى مصرى باركن العربية فى الممنوع ... وباتصور انى مش هاخد مخالفة

 

- لأنى مصرى باتكلم فى التليفون بالساعات ... وباتصور ان الفاتورة هتيجى قليلة

 

- لأنى مصرى بامشى فى الشارع عكسى ... وبازعل لو الظابط سحب منى الرخص

 

- لأنى مصرى مش باشتغل بضمير ... ومع ذلك متوقع انى اترقى

 

- لأنى مصرى مش باصلى ... ومع ذلك مستنى اتغير

 

- لأنى مصرى مش باقرأ الكتاب المقدس ... ومع ذلك متوقع انى اعرف الله

 

- لأنى مصرى مش باقرأ غير 1\4 كتاب فى السنة* ... وباستغرب انى انسان سطحى

 

- لأنى مصرى باسهر طول الليل ... وباستغرب ليه بانام وانا فى الشغل

 

- لأنى مصرى مش باغسل سنانى ... وباستغرب أوى لما تسوس

 

- لأنى مصرى باكل كل اللى نفسه فيه ... وباحزن اوى لما ألاقى نفسى تخنت

 

- لأنى مصرى باروح المحاضرة متأخر ... وباستغرب اوى لو الدكتور مادخلنيش

 

- لأنى مصرى مش باذاكر ... ومع ذلك باتوقع انى هانجح واجيب كمان تقدير

 

- لأنى مصرى باغش فى الامتحان ... وباتوقع انى ماتمسكش من المراقب

 

- لأنى مصرى باشرب سجاير ... وباستغرب اوى لما صحتى تتدهور

 

- لأنى مصرى مش باخد الدواء ... وباسأل نفسى انا ليه مش باخف

 

- لأنى مصرى مش باسلم شغلى فى ميعاده ... وباتضايق لو مديرى زعق لى

 

- لأنى مصرى مش باروح شغلى فى ميعاده ... وباستغرب لما مرتبى بيتخصم منه

 

- لأنى مصرى باتريق على كل اللى حواليا ... وباستغرب جداً لما يزعلوا

 

- لأنى مصرى باتكلم على كل اللى اعرفهم من وراهم ... وبازعل لو الكلام وصللهم

 

- لأنى مصرى بارمى الورق فى الشارع ... وباستغرب ليه البلد زبالة كده

 

- لأنى مصرى باتفرج على التليفزيون طول اليوم ... وباستغرب انا ليه مش مركز

 

- لأنى مصرى باروح كل مواعيدى متأخر ... وباستغرب ان كل حاجة بتفوتنى

 

 

 

يعنى من الآخر ....

 

- أنا مصرى باعيش حياتى ... ومش باتحمل أى حاجة من مسئولياتى

 

- أنا مصرى فهلوى وفوق القانون ... وأى حد غيرى مجرد أهبل وزبون

 

- أنا مصرى عايش حياتى تهريج وهزار ... والجد والاجتهاد من دماغى طار

 

- أنا مصرى مش مصدق ان الحياة صعبة ... وشايفها بكل ما فيها مجرد لعبة

 

- أنا مصرى مؤمن بالسحر والجلاجلا ... وكل حاجة هتجينى من غير تعب أو بهدلة

 

مايكل مكرم