تعالى أما أحكيلك حكايتي:
قالوا لي: (أحنا اللي رايحين اسكندرية) .. تعالى نوصلك معانا ..
وأنا من يومي باحلم اروح اسكندرية ..
صدقتهم وركبت معاهم .. اطمنت لهم ونمت لحد ما نوصل ..
بس لأنهم قالوا لي (أحنا اللي رايحين اسكندرية) ..
صحيت بعد مدة لقيتنا لسة ف السكة رغم إننا كان مفروض نوصل من بدري ..
سألتهم: ليه ماوصلناش لغاية دلوقتي؟
قالوا لي: اطمن ونام .. شوية وهانوصل .. أحنا عارفين السكة كويس ..
ده (أحنا اللي رايحين اسكندرية) ..
ابتديت اقلق وبصيت حواليا .. لقيت كل اليفط بتقول أننا رايحين أسوان !!
سألت تاني: هو أنتوا متأكدين من الطريق؟
لأن الوقت أتأخر وكمان مفيش حاجة حوالينا بتأكد أننا ماشيين صح ..
صرخوا فيا: صدق كلامنا وغمي عينيك وماتبقاش شكاك .. ولو مش عاجبك فارقنا من سكات ..
بس خلي بالك أنك هاتتوه لأنه مفيش غيرنا ..
(أحنا اللي رايحين اسكندرية) ..
احترت ..
افضل معاهم رغم إنه مفيش حاجة بتأكد أنهم رايحين اسكندرية إلا كلامهم ..
ولا انزل ف وسط السكة واخاطر بإني أتوه زي ما حذروني؟؟
سألت قلبي قالي: انزل دلوقتي حالاً ..
أكرم لك تعيش تايه وبتدور ع الطريق ..
بدل ما تفضل معاهم وأنت عارف أن كل يوم بيمر عليك أنت بتبعد أكتر وأكتر عن حلمك ..
أنا حكايتي أبتدت كدة ..
أنت بقى اسكندريتك اللي بتحلم بيها فين؟
طب أنت فين منها؟
رايحها مع (اللي رايحين) .. ولا نزلت تدور عليها لوحدك؟
