" صرخات من القلب "
قدام حاجات بيعجز الكلام عن وصفها
وقدام اهات الصرخات مش بتكفي تعبر عنها،
قدام قلوب بتتعصر
والنفس عاجزة انها تقوم وتنتصر،
وقدام اذهان وقفت من صعوبة الافكار
وقدام عقل مقدامهوش غير انه يحتار،
وقدام سؤال بيبدأ ب ليه
وجواب يمكن كتير مش بنلاقيه،
وقدام معزون متعبون
و مواقف صعب انها تهون،
قدام سواد ليل حالك
وضلمة غطت وطالت،
قدام دقايق قليلة من الافراح
وساعات كتيرة من الانطراح.
وقدام موت بيفكر انه قدر ينتصر.
بلاقي صوت هادي وخافت بيقول
اصرخ بكل مافيك من قول،
ما اصل انا صرخت زيك زمان
ودقت كل مر وهوان،
عارف كل اللي انت بتمر بيه
وحزنك وتعبك مقدروا وحاسس بيه،
زي ما انا اتألمت واتجربت
اقدر احس بكل حزن فيك وكبت،
مش هازعل منك او احتار
ومستحيل اخلي حد ينهار،
انا باسمح بالتجربة والانة
لكن بادي معاها المنفذ والفرجة ،
عارف كويس انا باعمل ايه
وكل ضايع وتايه باعرف كويس الاقيه،
اصل انا الاله القدير
وباعمل كل شيء للخير،
باعرف كويس اتحكم في الامور
وكل حد يصبر اكيد هينول،
تعالالي باللي فيك
ومتخليش حزنك يغبش عينيك،
بص كويس عالوعود
وخليك دايما بيها متشدد ومسنود،
علاقتي بيك مش مجرد كلمات
والا حتي مبنية علي خد وهات،
اقبل كل تشكيل بعمله فيك
اصل ايدي مش زي ايديك،
ارفع عنيك دايما لفوق
وخلي حياتك بيا تتملي وتفوق.
امجد اسحق
