" خليك في حالك "
هما فاكرين بنظرتهم ديه هايشبعوا دول مساكين،
لما بابقي ماشي في الشارع باحب اخد بالي من
عيون الرجالة اللي ماشين وخصوصا لما تبقي في بنت
ماشية او لابسة ملابس ملفته،
بتعجب اوي من الرجالة دول اللي مش سايبين بنت في حالها كبار كانوا او صغيرين عذاب حتي والا متجوزين،
هما مش بيعملوا حاجة تبان انها غلط او عيب هما بياكلوها بعنيهم بس ، لدرجة انهم عندهم استعداد يتمعنوا في النظر ويبصوا علي كل تفاصيل البنت،
وبيعتبروا ان داه عادي مفيش فيه مشكلة، وعجبي! ،
حقيقي الناس دول يصعبوا علي الواحد، لاني باشوف فيهم
جوع وفراغ شديد، وفاكرين انهم كدة يقدروا يملوه،
سليمان بكل عظمته اتجوز 1000 واحدة ومشبعش،
ورجع في الاخر قال باطل الاباطيل الكل باطل، وداه اكبر دليل علي ان كل داه مشبعهوش،
ياصاحبي ياغلبان وانت ماشي في الشارع سيب الناس في حالها وملكش دعوة بالرايح والا اللي جاي ولا حتي اللي لابس والا اللي من غير هدوم، اتعلم ان ملكش حق تمشي في الشارع ديان سيب الناس في حالهم، ومتعتديش علي حريتهم بعنيك .
ولو انت جعان دور علي اللي يشبعك حقيقي ، يشبعك بجد، مش يجوعك اكتر من زمان، وخليك محترم زي الرجال اللي محترمين، اللي لما بيشوفوا بنت ماشية قدامهم عندهم استعداد يسابقوا ويسرعوا ماشيتهم علشان متفتكرش انهم ماشين وراها.
خليك محترم خليك انسان. " ومين سمع "
امجد اسحق
