لازم كده

سيلفيا وجدي ٢٢ أكتوبر ٢٠٢٠

لازم كده

لازم يكون اللبس كده
لازم تكون الصلاه كده
لازم تكون الطقوس كده
و لما تسأل ليه كده..... يقولوا هو كده !!!!
لما تقول لهم لازم نحب بعض لازم نقبل بعض
ييجوا عند لازم هنا و تكون مشكله
لازم كل حاجه لكن لازم نحب لأه
لازم نقبل برضه لأه ..... ناس غريبه
في الشغل يسألوك أنت مسيحي؟؟
و في  الكنيسه يسألوك أنت أورثوذكسي؟؟
و لما تقول لهم أنا مسيحي بس مش طائفي
يبرأوا و يقولولك .. دي طايفة جديدة؟؟
كنت أفكر أن الأورثوذكس بس همه اللي فاكرين نفسهم صح و الباقي غلط
بس لما شفت طوايف ثانية فيها ناس بتفكر نفس الفكر
عرفت أن الموضوع مش موضوع طايفة
ده موضوع فكر.
نميز البشره الفاتحه .. نميز جميل الطلعة
نميز بني جنسنا .. اللي يتكلموا زينا
اللي يفكروا زينا .. اللي يعبدوا زينا
و غير كده كل الناس حوالينا متخلفين كافرين
لازم يكونوا زينا .... و عجبي
لما تقولهم أن الله عينيه مختلفه مش بيبص زينا
الله بيبص للقلب
يقولوا بس لازم نعترف .. لازم سر التناول
لازم نلبس إيشارب .. لازم نرشم الصليب
لازم نقرا الأجبيه .. لازم نرفع إيدينا
لازم نسقف .. لازم ربنا يحاسب الناس كده
ده في النار و ده في السما.
يـــــــا رب أشكرك .. لأنك مش بتفكر زي البشر اللي خلقتهم
بس أملي أننا نفهم فكرك أنت
************
سيلفيا وجدي
القاهرة